SeputarBoltim.com – Kolabung mako nion ki adi’ bo ompu lipu’ in Tutuyan minaya’ noziara kon kubur i Aki Pondabo Modeong kon lipu’ Tutuyan.
Adi’ bo Ompu minaya’ nopoyaput in doa, ba’ ki Aki Pondabo Modeong ogoyan-Nya pa doman I Togi Kawasa in tampat ta motompira, moluas, mobayag, mobondu in kuburnya, bo mokouli’ pa doman kon safa’at.
“Gigi’ adi bo ompu sinumi na’aya paralu monotaaw o’uman ki Aki Pondabo Modeong, ba’ kotawaan naton komintan na’anda lopi’ bo yoyiga monia kon tungkul in tuwa,” kai Awaludin Umbola, tobatu tonggulu kon lipu’ in Tutuyan.
Moduduy kon tuwa, kai tobatu ompu i Aki Pondabo Modeong, turunannya noginggopat, ki Syawal Modeong, Ki Aki Pondabo Modeong na’aya in tonggulu mogutat motolu adi’ in Tutuyan. Sia in nomontang Kon lipu in Tutuyan.
Kon tungkul in tuwa, masa pa in Bolanda’, lipu’ in Tutuyan na’aya omonig bi’ kon Idoub ande Bakan, tana’aya mangoy sinangoy munia lipu’ in Bukaka.
Kainiya doman, poduduy o’uman in guyangga doday tuwa, lipu Idoub ande Bakan tuwata in bulud.
Eda’ kai Aki motayakpa kita kon tolibuta’ ande lopa’ ta motaaw posipunan kon adi’ bo ompu kon singgai tumi.
Na’anda ka’asi in mogoguyang sinongganutan i Aki Pondabo Modeong minaya’ in siol, mosilig motakod kon tangaton, onda norawoy don kon binayaan, noyitutuy kon lopa’ moluas bo sinanggoyan monia Lopa’ Kinotutuyan. Tana’ya nobali’ don lipu’ Tutuyan.
Kon tungkul in tuwa, kain Datu in Bolaang Mongondow ki Aki Pondabo Modeong in o’indongogan kon Tutuyan, manangka tuwa ki Aki Pondabo Modeong dinui’ bobato in Tutuyan taong 1901-1937.
(RB/Red)
